30 ألف قدم

فتحوا الدولاب وطلعوا كل الصور اللي كنت مخبياها
صورهم أول ما اتولدوا.. 3 حضانات جنب بعض في المستشفى.. وأنا لوحدي قاعدة في النص
صورة أول يوم حضانة.. واحدة بتعيط.. واحدة بتضحك.. واحدة نايمة
صورة أول مرة قالوا ماما.. كنت مسجلها فيديو
وهو بيتفرج.. وكل صورة يبص لي ويقول
كنتي لوحدك؟
أقول له
لأ.. كنت معاهم
قصدي.. مفيش حد كان معاكي؟
كان معايا ربنا.. وكان معايا المحامية.. وكان معايا الست اللي كانت بتيجي تساعدني ترضع واحدة وأنا برضع اتنين
سكت.. وبعدين قال
وأنا كنت فين؟ كنت في مؤتمر في سويسرا بتكلم عن العيلة والمستقبل المستدام.. وأنا سايب عيلتي الحقيقية
البنات زهقوا من النكد.. قاموا شدوه
قوم.. قوم نلعب استغماية
قام.. راجل طوله متر وتمانين.. لابس بدلة.. بيلعب استغماية في أوضة 3 في 3.. وبيستخبى ورا ستارة شفافة والبنات شايفاه وبيضحكوا عليه ويقولوا
شفناك!
وأنا واقفة على الباب بتفرج.. أول مرة من 5 سنين أحس إن البيت فيه صوت راجل غير صوت التليفزيون
بعدها بشوية.. قلت للبنات
يلا.. عشان معاد الغدا
طلعوا يجروا على المطبخ.. وهو قام.. ظبط بدلته اللي اتكرمشت.. وقال لي
محتاجة مساعدة؟
قلت له
تعرف تعمل مكرونة؟
بعرف أشتري مصنع مكرونة
لأ.. هنا بنعملها.. مش بنشتري المصنع
دخل المطبخ.. لقى 3 كراسي صغيرة.. و أطباق بلاستيك.. و كوبايات بنفس اللون
قال
انتي جايبة كل حاجة 3؟
قلت له
أيوه.. عشان لو جبت 2.. التالتة هتعيط.. ولو جبت 4.. هيتخانقوا مين اللي هتاخد الزيادة.. فبقيت أجيب 3 بالظبط
قعد يقطع طماطم.. وأيده بتترعش.. عمره ما دخل مطبخ.. طول عمره عنده شيف
البنت الكبيرة قالت له
قطعها صغير.. ماما بتحبها صغيرة
قال لها
حاضر يا مديرة
قعدنا ناكل.. 5 كراسي حوالين ترابيزة صغيرة.. أول مرة الترابيزة الصغيرة يبقى عليها 5 أطباق.. طول عمرها عليها 4 بس
البنات بياكلوا وبيتكلموا مع بعض بصوت عالي.. وهو بيبص لهم كأنه بيتفرج على فيلم.. مش مصدق إن دول شبهه وبيتكلموا وبيتخانقوا على مين هتغسل المعلقة
بعد الغدا.. البنات ناموا.. كانوا تعبانين من العياط واللعب
فضلنا أنا وهو قاعدين في الصالة.. ساكتين
قال
ممكن أسألك سؤال؟
اسأل
ليه مقولتيش؟ يعني بعد ما ولدتي.. ليه مبعتيش؟ ليه مقلتيش دول ولادك؟
بصيت له وقلت
بعت.. بعت لك إيميل فيه صور السونار وصورهم أول ما اتولدوا.. وبعت لك جواب مع المحامية.. وبعت لك رسالة مع السواق بتاعك القديم.. وكلهم رجعوا.. السكرتيرة قالت.. الأستاذ مش عايز أي حاجة ليها علاقة بيكي.. والمحامية قالت.. هو قال أي طفل مش هعترف بيه.. والسواق قال.. رمى الجواب من غير ما يفتحه
وشه بقى أبيض
قال
أنا.. أنا قلت للسكرتيرة أي حاجة منها احرقيها.. كنت فاكر إنك عايزة فلوس.. كنت غبي.. كنت فاكر إنك بتحاولي ترجعيني بالعيال.. زي الأفلام
قلت له
وأنا كنت بحاول أقول لك إن عندك 3 بنات شبهك.. مش برجعك.. أنا كنت بخرجك من حياتي خالص.. بس كنت عايزة أديهم حقهم.. يعرفوا إن عندهم أب
قام وقف.. راح ناحية الشباك.. وبص على الجنينة.. الجنينة اللي فيها 3 عجلات صغيرة و نطاطات
قال
أنا عايز أعوض.. عايز أعوض كل حاجة
قلت له
التعويض مش فلوس.. الفلوس أنا عندي.. الشركة بتاعتي بقت أكبر من شركتك.. التعويض إنك تبقى موجود.. لما واحدة تسخن بالليل.. تصحى معايا.. لما واحدة تقع في المدرسة.. تروح معايا.. لما واحدة تقول عايزة بابا.. تلاقيك.. مش مسافر
قال
موافق.. من النهاردة.. مفيش سفر.. أنا هنقل كل شغلي هنا.. هفتح فرع الشركة هنا جنب بيتكم
ضحكت غصب عني
جنب بيتنا؟ احنا ساكنين في منطقة عادية.. مش في التجمع
أي مكان فيه انتوا.. يبقى تجمع
بصيت له.. نفس الكلام الحلو بتاع زمان.. بس المرة دي.. وراه 3 بنات نايمين جوه
قلت له
طب.. والبنات؟ هتقول لهم ايه في المدرسة؟ لما يسألوهم بابا بيشتغل ايه؟
هقول لهم بابا كان غبي.. وبيحاول يبقى ذكي دلوقتي
بعدها باسبوع.. كان عيد ميلاد البنات.. 5 سنين
عملنا عيد ميلاد في الجنينة.. 3 تورت.. كل واحدة لون.. و ميكروسكوبات زي ما طلبوا
وهو جه.. ومعاه 3 هدايا كبار.. و شنط صغيرة.. وورقة
اداني الورقة وقال
دي مش فلوس.. دي أسهم.. 30 في المية من شركتي.. باسمهم هما التلاتة.. عشان لما يكبروا.. يعرفوا إن بابا حتى لو اتأخر.. جه
قلت له
مش عايزين أسهم.. عايزينك انت
قال
الأسهم هتفضل.. وأنا هفضل برضه
البنات شافوه من بعيد وجريوا عليه
بابا جه! بابا جه!
الكبيرة كانت لابسة طوق مكتوب عليه أنا الكبيرة ب 5 دقايق
قالت له
شفت؟ احنا كبرنا 5 سنين وانت مكنتش معانا.. بس دلوقتي هنكبر سوا
شالها.. وشال التانية على كتفه.. والتالتة مسكت في رجله.. ودخل بيهم الجنينة وهو بيقول
من النهاردة.. أي حد هيسألني.. خسرت ايه؟ هقول له.. أنا مخسرتش.. أنا كنت سايب أهم 3 حاجات في حياتي عند واحدة ست أقوى مني.. وهي حافظت عليهم لحد ما رجعت
وأنا واقفة بتفرج عليهم.. 3 بنات شبهه بالظبط.. بيضحكوا نفس ضحكته.. وراجل كان فاكر إنه جاي يوريني أنا خسرت ايه.. واكتشف إن هو اللي كان خسران كل حاجة.. ولقاها في مطار.. نازلة من بنتلي.. بتجري وتقول ماما